Contoh Pidato Pasambahan Makan
Suhefriandi
Pesantren Terpadu Serambi Mekkah
Waktu dikampung, kami anak anak muda di minang kabau wajib belajar ini..
assalamualaikum warahmatullahhiwabarakatuh
Mano sagalo niniak mamak nan gadang basa batuah rila jo maaf ambo pintakan diatok ateh surambi disusun jari nan sapuluah sambah jo simpuah manjalani kabakeh datuak sambah sabarih sapatah kato.
Bari ampun lah ambo mandatangkan sambah, sambah saujud manjalani, kaharibaan sagalo datuak sagalo tuk angku, nan saisi rumah nan ko, nan tatanai dek lantai, nan talingkuang dek dindiang, nan tasungkuik dek atok, gadang indak disabuik gala, ketek indak di imbau namo, dalam buah pasambahan kasadonyo, zahirnyo sambah bakeh datuak. jo sambah simpuah salam diangkek, sakali gawa baribu ampun, maafkan juo badan ambo, dalam buah pasambahan, kok salah mintak di patuik in, sasek mintak di imbau, taluncua mintak disentak, sabok amboko kurang pandapek nan bak sikek, kurang susun nan bak siriah, ilmu pangatahuan jauh sakali, ala nan kajadi buah pasambahan diadat sawajah ko kini, ala katangah siriah di carano, niniak mamak sarato tuk angku, duduk balingkuang kasadonyo, sambah manyambah dipabanyak tandonyo adat kadipakai. salingka gunuang marapi saedaran gunuang pasaman, adat kan samo kito pakai limbago kan samo kito tuang, apolah adat nan biaso kito pakai, partamo manyalamatkan yang mati, kaduo mampajuduakan nan iduik.
Sambah caliek juadah
Ma nyo datuak, ka datuak sambah sabarih
manitah la
Tantangnyo adat sambah manyambah kito pulangkan sajo ka nan pandai, baatu nan kini lah bausao janang kami maedarkan juadah kahadapan kito masiang – masiang, sambah taserak ka nan rami salam kapado nan basamo, awa dikana tantang iko akhia disabuik niek jo nazar, nan taniek nan tanazar dek kami sipokok sipangkalan, tantang juadah nan katangah kok gawa manti jo janang, kurang ririk nan bak paga kurang susun nan bak siriah, walau malembak di nan panuah atau balakuang di nan ranah, nan kurang kok indak tatukuak nan umpang kok indak tasisik, nan patuik ditangah kok ditapi nan ditapi kok katangah, atau tiok – tiok sasuatu nan indak talatak pado tampek nyo dengan tidak disangajo, nak dicaliak dek alek nan datang sakian sambah bakeh datuak.
Lah sampai dek datuak
dibilang alah
Sapanjang buah panitahan datuak nan taserak ka tangah-tangah, tatabua kamuko rapek la diatok la disusun dari awal sampai ka akhir, indak ka diulang kilin ditikam jajak, diulang kilin banang kok putuih diulang tikam jajak kok lapeh, ma nan kajadi buah kabanaran dek datuak tantang juadah nan katangah, kok gawa manti jo janang, kurang ririk nan bak paga kurang susun nan bak siriah, walau malembak di nan panuah atau balakuang di nan ranah, nan kurang kok indak tatukuak nan umpang kok indak tasisik, nan patuik ditangah kok ditapi nan ditapi kok katangah, atau tiok – tiok sasuatu nan indak talatak pado tampeknyo dengan tidak disangajo, nak dicaliak dek alek nan datang, kan baitu bana bunyi pasambahan datuak tadi.
Pihak dek kami sialek nan datang
lah dilayangkan pandangan jauah lah ditukiak kan pandangan ampia, dek cadiak manti jajonang mainpantan tuah karajo la manjadi, kok cangkia lah sabilang jari juadah la sabilang adap, indak ado kurang kaditukuak indak ado umpang kadisisik, baa sabaliak pado itu, kok basobok juo tiok-tiok sasuatu nan indak talatak pado tampeknyo, kito patopek sajo dengan maaf jo karilaan.
Pasambahan ka makan
Manyo datuak, kadatuak sambah sabarih
pihak dek kami sipokok sipangkalan tagak nan bapusu duduk nan baropok, bulek aia la kapambuluah bulek kato kamupakat, tabumbuak kabadan diri ambo sabagai ujuang jari sambungan lidah, paanta kato dari sipokok sipangkalan, kok lai gayuang patuik disambuik kato patuik dijawab, atau pasambahan patuik dipalegakan, iyo kan tarabiknyo dibadan diri ambo.
Pihak kabadan diri ambo pakirim lai ka bapasampai umanah bapagang taguah, suruahan urang banamokan, tapi samantang pun baitu bukan dek ria hati didalam bukan dek cece karano aka,bukan tugendeang karano kain,tagah dek patuah kanan tuo, lai kajadi andai dek nan tuo, bakato - kato rang daulu babeda – beda rang kini, sabuang biaso bajuaro kapa biaso banakodo, alek barajo janang, tasabuik sabuang bajuaro tau dituah sisiak ayam tau dicacek nan cilako tau dibulang kaba kiciuah tau ditaruah kaba ungkai, tabilang kapa banakodo urang nan arif bijaksano sawua dibongka pagi tadi, kapa balabua kalammari, tau diangin kabasiru, tau diombak kabasabuang, tantu dilauik balarangan, tasabuik alek barajo jonang pandai maagak jo maagiah pandai maetong labiah jo kurang, malatak kan sasuatu pado tampeknyo.
Pihak kabadan diri ambo nan maatok maatur adat sawajah iko kini, ragi kok indak katatiru, suri kok indak taturuikan, atau cupak kok indak tapanuah kan, dipanuahkan sajo jo karelaan, talabia bana pado alek tamu kami, nan sararak babondong tibo kailia sarangkua dayuang mudiak sarantak gala , dakek lah tibo jauah lah datang la tahimpun diateh rumah nangko.
Pihak dihari sahari kini, hari nikmat, hari termulia raso dibondong rajo – rajo, raso di do’a wali – wali turun malaikat kateh bumi, tatukiak pandangan ka nan ampia, lah nampak sanak jo famili sarato karib jo kirabat, nan basimpang jo basapiah, nan bajangko jo baeto, ipa jo bisan sarato sumando manyumando, cukuik jo bidang niniak mamak, lah duduak dilapiak nan takambang talingkuang dek dindiang 4 sagi, tasungkuik dekatok rumah nanko, rumah sudah minantu naiak, anak surang lah baduo kok mujua la sakujua badan, suko pun ala sapanjang hari.
Sairiang balam jo barabah
balam lalu barabah mandi
sairiang salam dengan sambah
salam lalu sombah kumbali
Sambah nan kan ambo pasambah kan, pihak diadat sawajah iko kini, antah ma hari ko nan elok, antah kutiko lah nan baiak, sadang wakatu bungo kambang, sawua tatagak angin tibo ajuang balayia dimusimnyo, kok sijamu datang babondong sipokok mananti basamo jonang manatiang sangaik la suko, kan panawa sagalo runggo hati, gabak diulu tando kahujan cewang dilangik tando kapaneh, layangkan malah pandangan jauah tukiakan malah pandangan ampia iyo kahadapan kito nan basamo, ibaraik kapa kabalayia nakodo laduduak dikamudi, juragan la hadia dihadapan tingga di datuak kamalayiakan, tapi dek manuruik pitua datuak dari sinan mamohon juo kami dari sinyak.
Nak ilia kabatang ari mudiak kapaua kamba basimpang jalan kapariaman, minum la aia nan taisi sontok la nasi nan katangah nak sanang hati sipokok sipangkalan.
sakian sombah bakeh datuak.
lah sampai dek datuak
dibilang alah
Sapanjang buah panitahan datuak tadi nan taserak katangah – tangah tatabua kamuko rapek talembai kakami alek datuak, dari oso lakami bilang basimak kato ciek – ciek
Tidak ada komentar:
Posting Komentar